Mimina, Katibu pa Kuantu Tempu Mas?

E buki aki ta dediká na Sila Kelie, Papa Bubu Melfor Suzanna Fransiska i Mimina (Katibu di Boneiru) Sila Kelie (Mai Sila) a kria mi hopi aña i e buki aki ta dediká kompletamente n'e pa su amor p'ami. El a siña mi kon ta mata galiña, kuida mata i kushiná kuminda krioyo. Papa Bubu, di Banda Bou, tabata manera un tawela pa mi i el a konta mi mashá kos di pasado. Su mayornan a kont'é di tempu di katibu. Hopi di loke ta skibí aki ta kosnan ku el a konta mi personalmente. Suzanna Fransiska (Tanchi Chu) ta un di mi welanan ku a kuida mi hopi den mi bida. Dia ku el a bai sosegá i mi tabata atendiendo su papelnan ofisial mi a ripará ku el a nase na 1913. Esaki ta nifiká ku e la nase djis 49 aña despues di abolishon! Esta su wela o bisa wela mester tabata katibu òf por lo ménos a biba den tempu di sklabitut! Dje serka ei sklabitut ta di nos? E buki aki ta skibí pa yuda nos komprondé nos historia di sklabitut mas mihó. Tur fecha i datonan den e buki aki ta histórikamente korekto. E personahenan di e 5 muhénan i nan shonnan ta kompletamente fiktivo. Na Boneiru tabatin un katibu muhé Mimina ku a hui bai Venezuela i a traha den Kòkou. Ta di dje mi a fia e nòmber Mimina. Asin'aki e tambe por haña honor pa e kurashi ku el a demonstrá e tempu ei. Espesialmente mi ke animá tur hende yòn pa lesa e buki aki ku un aktitut di siña nos historia sin laga rabia drenta boso kurason.