D'Rennscheier

„Deen anere Muergen, wéi de Guide net direkt mat sengen Explikatiounen duergefuer ass, huet ee fir d’éischt eng Stëmm, dunn e puer, an op eemol déi ganz Gesellschaft héieren, déi am Chouer geruff huet: ‚Eng Geschicht! Eng Geschicht! Eng Geschicht!‘“ D’Rennscheier ass d’Geschicht vun engem klenge Bouf, deen den Driff fir an déi wäit Welt ze reesen, mat an d’Wéi geluecht krut. Eise Guide, déi rengste Rennscheier, hält et einfach net aus doheem. Hie féiert eis an nobäi 30 Geschichten duerch Länner op verschiddene Kontinenten, mat drolegen, awer och emol nodenkleche Momenter, déi eis weisen, wéi verschidde Lëtzebuerger an de leschte Joerzéngte gereest sinn. Duerch déi vill Anekdoten hannerléisst hien eis en amusanten, heiansdo och e kriteschen Androck vun deene frieme Länner, déi e besicht huet, an net ze vergiessen, vun deenen interessante Mënschen, déi en duerch d’Welt gefouert huet, oder op deene verschiddenste Plaze kenne geléiert huet. Ob Méchelbuch, Italien, Spuenien, Portugal, Irland, de Balkan, Russland, Tierkei, Nordafrika, Kalifornien, a vill aner Plaze méi, d’Rennscheier zitt seng Kreesser ëmmer méi wäit. Lëschteg an awer och nodenklech Erënnerungen un eng schéin Zäit, wou den Auteur mat interessante Leit ënnerwee war, an Europa an doriwwer eraus. „D’Rennscheier - E Guide erzielt“ ass no „E Bouf erzielt“ a „Koppeges & Bosseges - E Schoulmeeschter erzielt“ dat drëtt Buch aus der Rei vu genësslechen Erzielungen, déi den Henri Losch bei den Editions Guy Binsfeld erausginn huet.